Ари аныҳәа азгәаҭо дарбанызаалак Аҧсны иатәылауаҩу Аҧсны Жәлар р- Џьынџьтәылатә еибашьра зхы ақәызҵаз , аветеранцәа ирызгәдууп. Сынтәа , 2023 шықәса рзы, Аиааира иахыҵит 30 шықәса!
Аиааира 30 шықәса ахыҵра аҳаҭыразы Аҧсны Аҳәынҭқарра Амиграциатә маҵзура анапхгареи аилазаареи Ахьӡ- Аҧша апарк аҟны ашәҭқәа шьҭарҵеит, ахақәиҭреи ахьыҧшымреи аагаразы зыҧсҭазаарақәа ахҭнызҵаз ргәаладыршәеит. Анаҩс, аррамаҵзурауаа Аҧсны Раҧхьатәи Ахада Владислав Арӡынба Имемориал ахь инеит, ашәҭқәа шьҭарҵеит.
Нанҳәамза 14 1992 шықәса рзы Қырҭтәыла архәҭақәа, аҳәаа иахысны Аҧсны иалалоит, ақырҭуа " гвардиа" бџьарла, џьаҧҳаныла , кәылӡтәы техникала еиқәных иҟаз ирылшеит аҳҭнықалақь Аҟәа рнапахьы аагара. Аха, 413 мшыи ҵхи ицоз аибашьра аҟны Аҧсны жәлар аиааира ргеит. Аҧсуаа ирывагыланы еибашьуан хатәгәаҧхарала арахь иааз Нхыҵ Кавказаа, Лада Урыстәылаа, аҳәаанырцә инхо ҳџьынџьуаа рыҷкәынцәа.
Аныҳәа иалахәын Аҧсны Ахада, аиҳабыра, аусбарҭақәеи аиҿкаарақәеи рхаҭарнакцәа, аибашьра аветеранцәа, аҳәаанырцәтәи аделегациақәа рхаҭарнакцәа, ашколхәыҷқәа, ҳтәыла ауааҧсыра.
Ҳарҭ- Аиааира ду аазгаз рхылҵшьҭра шәфырхаҵара аҿаҧхьа ҳхырхәоит.