Аԥсны актәи атәылахьчара аминистр, Аҳәынҭқарратә Амиграциатә маҵзура ашьаҭаркҩы, уи раԥхьатәи анапхгаҩы аинрал-леитенант Аршба   Владимир Гьаргь-иԥа диижьҭеи 65 шықәса аҵра арыцхә инамаданы уи  иҳаҭгәын аҿы ашәҭшьыҵәрақәа шьҭарҵеит, анаҩс Аҟәа "Ахьӡ-Аԥша" апарк аҟны игылоу  ибиуст  аҿаҧхьа ихырхәеит Аҳәынҭқарра Амиграциатә маҵзура аиҳабы аинрал-маиор Габлаиа Рамини амиграциатә еилакы  аусзуҩцәеи.

   Иара убас, амиграциатә маҵзура анапхгареи аусзуҩцәеи  алахәын Владислав Арӡынба ихьыӡ зху аибашьра афырхаҵаратә музеи аҟны  Владимир Аршба изкны имҩаҧгаз агәаларшәаратә хәылԥаз.

Аршба Владимир диижьҭеи 65 шықәса аҵра иазкыз агәаларшәаратә хәылԥаз аҿы ажәахә ала иқәгылаз Амиграциатә маҵзура анапхгаҩы ихаҭарнак Гамсаниа Едуард дазааҭгылеит Владимир Аршба аҧсуа аҳәынҭқарра ашьақәгылараҿы илагала ду атәы:

"Владимир Аршба дыруаӡәкын 1992-1993шш. рзтәи аибашьраҿ аиааира аагареи, аибашьра ашьҭахьтәи ашықәсқәа рзы Аҧсуа ҳәынҭқарра ашьапы ақәгылареи, азхаҵареи аус аҟны  хымеигӡара ҟамҵакәа иқәԥоз. Иара ибзоуроуп иахьа аҳәынҭқарра аҟны иаҧҵоу Аҧснытәи аҳәынҭқарратә миграциатә маҵзурагьы. Уи иусқәа , иџьабаа ижәлар рыҟны ахааназгьы хашҭра ақәны иҟалом.”

Аԥсныҟа усураҳәа иаауаз амигрантцәа рхыҧхьаӡара еизҳауа ианалага, усҟантәи аамҭазы Аҧсны Ахадас иҟаз Сергеи Уасил-иҧа Багаԥшь Аҳәынҭқарратә амиграциатә маҵзура аҧҵаразы аусҧҟа инапы аҵеиҩит ,насгьы иара убри аусҧҟа ала Аҳәынҭқарратә амиграциатә маҵзура актәи анапхгаҩыс даҭан Владимир Аршба.
Жьҭаара 21, 2009 шықәса инаркны 2015 шықәсанӡагьы амиграциатә маҵзура анапхгаҩыс аус иуан.

«Хашҭра иқәым Аԥсны Афырхаҵа!» - иҳәеит Гамсаниа Е.Ҷ. иажәахә хыркәшо.

Габлаиа Рамин Заур-иԥа Ашәарҭадаратә хеилак амаӡаныҟәгаҩ Шамба Сергеи Мирон-иԥа ианеишьеит аҳәынҭқарра амиграциатә маҵзура амедал "аинрал-леитенант В.Г.Аршба" , ари ахылаҧшырҭа иреиҳаӡоу ҳамҭатә дыргоуп.